Nagpatigayon sang send-off ceremony sa Culasi Port sa Roxas City ang Department of Agriculture-Bureau of Fisheries and Aquatic Resources (DA-BFAR) Region VI para sa pagpatuman sang law enforcement operation kasunod sang pagsugod sang Closed Fishing Season sa Visayan Sea.
Sa interview sang Bombo Radyo kay Remia A. Aparri, Regional Director sang Department of Agriculture-Bureau of Fisheries and Aquatic Resources (DA-BFAR) Region VI , iya ginpahayag nga paagi sa sini nga tikang, ginalauman sang ahensya nga maprotektahan kag mapadamo ang mga isda sa kadagatan agud masiguro ang padayon nga pangabuhian sang mga mangingisda.
Suno kay Aparri, may nagakago nga penalidad nga pagaatubangon sang mga madakpan nga magalapas sa pagsulundan kag magapangisda sa mga lugar nga sakop sang closed fishing season.
Sa probinsya sang Capiz, ginadumilian anay ang pagpangisda sa mga kadagatan nga sakop sang Roxas City, Pilar, Pontevedra kag President Roxas, bilang kabahin sang pagpanalipod kag pagpadamo sang mga isda sa Visayan Sea.
