ROXAS CITY — Isa ang Roxas City sa mga syudad nga natalana nga bisitahan sang mga opisyal sang Healthcare Information Management Association of the Philippines (HIMAP) kag mga representante sang nagkalain-lain nga dalagko nga kompanya sa Nobyembre 23 tubtob 24, 2026.
Kabahin sang ila pagbisita ang pagpatigayon sang dialogue agud mapakita ang potensyal sang Roxas City sa mga negosyo sa sektor sang Healthcare Information Management kag Information Technology-Business Process Management (IT-BPM).
Paagi sa sini nga inisyatibo, ginapaabot nga mabuksan ang dugang nga mga oportunidad para sa pagpamuhunan nga posible makahatag sang madamo nga bag-o nga trabaho para sa mga pumuluyo sang syudad kag probinsya sang Capiz.
Samtang, ginpahayag ang pagpasalamat sa Pueblo de Panay Inc. sa ila pagbulig kag pagpanikasog agud maimbitahan ang HIMAP kag madala ang ini nga oportunidad sa Roxas City.
