Handa na ang Filipina tennis star nga si Alexandra “Alex” Eala para sa ASB Classic sa New Zealand kontra sa Croatian Olympic silver medalist nga si Donna Vekic subong nga adlaw.
Ang 20-anyos nga si Eala, nga yara sa ika-53 nga pwesto sa Women’s Tennis Association (WTA) rankings, nga magasulod sa torneo bilang ikaapat nga seed,kasunod nanday Ukrainian Elina Svitolina kag American Emma Navarro kag Iva Jovic.
Matandaan nga si Vekic, nakalab-ot na career-high singles ranking No. 17 kag yara sa subong sa ika-69 nga ranking.
May yara man siya sang apat ka WTA singles titles kag ginakabig nga beterana nga humalampang sa women’s tour.
Madumduman nga si Eala nalakip sa ASB Classic pagkatapos sang isa ka makasaysayan nga 2025 season, sa diin nakasulod siya sa WTA Top 100 sa una nga tion, nagdaug man siya sang iya una nga titulo sa WTA 125, kag nagdala pauli sang gold medal sa Southeast Asian Games.
