Pagatinguhan ni Filipina tennis star Alexandra “Alex” Eala nga maayo ang iya pagsugod sa iya Middle East swing sa Abu Dhabi Open, sa diin atubangon niya si Zeynep Sonmez sang Türkey sa Round of 32 subong nga adlaw.
Indi bag-o para kay Eala si Sonmez bangud Makaduha na sila ka beses nga nagkit-anay sa singles competition sa ila ITF days kag lunsay nagtapos sa kadalag-an para sa Pinay.
Una sila nga nagkitaay sa ITF France 22A sang Nobyembre 2023, nga ginsundan sang isa ka rematch sa Eastbourne Open sang Hunyo 2024, sa diin liwat nga nagdaug si Eala.
Ang duha nag-atubangay man bilang doubles opponents sa ITF Luxembourg sang Nobyembre 2023 kag sa ITF Slovakia sang 2024, nga labi nga nagpabakod sang ila pagkapamilyar sa isa kag isa.
Magluwas sa singles, magapaindis-indis man si Eala sa doubles event, sa diin makaupod niya ang Southeast Asian standout nga si Janice Tjen.
Sa una nila nga hampang, atubangon nila ang kombinasyon sang Canada nga si Leylah Fernandez nga may dugo nga Pilipino kag sang France nga Kristina Mladenovic.
Nalab-ot naman ni Eala ang kadalag-an sa isa ka makasaysayan nga homecoming sa Philippine Women’s Open, sa diin siya nagpaindis-indis sa labing una nga tion sa Pilipinas.
