Nagpasundayag ang Filipino-Canadian tennis star nga si Leylah Fernandez matapos sini nga ginlutos ang Russian nga si Anna Kalinskaya sa straight sets, 6-1, 6-2, agud makuha ang DC Open title sang Dominggo.
Ang nadag-an amo ang labing-una nga WTA 500 title ni Fernandez kag una nga championship umpisa sang 2023. Nagdugay lamang sang masobra sa isa ka oras ang hampang, kun sa diin gin-domina niya ang bug-os nga match.
Matapos ginlutos ang top seed nga si Jessica Pegula kag anay Wimbledon champion nga si Elena Rybakina, nakuha ni Fernandez ang iya ika-apat nga WTA title sa iya nga career.
Madasig man nga nakuha ni Fernandez ang una nga set sa sulod sang 30 minuto samtang sa ika-duha nga set, madasig man siya nga nakalamang kag dalayon nga gintapos ang hampang sa iya ika-duha nga match point.
Masunod nga masabak si Fernandez sa WTA 1000 Canadian Open sa Montreal, kun sa diin mas mabudlay suno ini nga hampang.
