ROXAS CITY – Ginpauntat na ang pagrelease sang financial assistance kag burial package sa probinsyal capitol sang Del Rosario Administration.
Ini ang ginkumpirma ni Provincial Social Welfare and Development Office (PSWDO) head Maria Barnes sang mainterview sang Bombo Radyo.
Suno kay Barnes, ginpauntat na ang paghatag sang financial assistance kag burial package nga 10 mil pesos para sa mga pumuluyo nga nagakihanglan sang bulig pinansyal gikan sa gobyerno.
Ginpahayag pa sini nga apisar natapos na ang banning period ginpakamaayo sa gihapon nga untaton anay ang pagrelease sini.
Dugang pa sini nga nagaagi ang tanan nga mga dokumento sa opisina ni Mr. Pepe Del Rosario.
Naistorya naman ni Barnes ang provincial administrator nga si Michelle Del Rosario kag ginpahayag sini nga ginaproseso pa nila ang mga utang kag balayaran sa mga funeral parlors kag ospital nga naglab-ot sa kapin 11 milyones pesos rason nga ginpa-untat anay ang releasing sini.
Ini bangud luyag ni Governor Antonio Del Rosario nga antes magpungko ang bag-o nga administrasyon ni Vice Governor Nonoy Contreras wala na ini sang bayaran nga utang.
Gin-athag man sini nga may yara pa man sang nabilin nga budget ang probinsyal capitol.
Nahibaluan nga wala pa naswelduhan ang mga empleyado sang capitolyo bangud tobtob sa karon wala pa nakabalik ang gobernador matapos ang ginpatigayon nga eleksyon sang Mayo 13, 2019.
Wala man nahibal-an ang rason sang pagpauntat sini kun may kaangtanan sa kalutosan ni Del Rosario.
