ROXAS CITY – Liwat nga nakarekord sang mga nabiktima sang palupok ang probinsya sang Capiz kadungan sang pagsug-alaw sang tuig 2021.
Suno kay Mr. Ayr Altavas, Public Information Officer sang Capiz Provincial Health Office nga apat ang nagdugang sa mga nalukpan sang palupok.
Sa karon, may yara na sang (10) ka mga biktima sang palupok ang nabalhag sa probinsya nga ginalakipan sang (3) sa syudad sang Roxas, tig-duha (2) sa banwa sang Jamindan kag Pontevedra samtang tig-isa naman sa banwa sang President Roxas, Ivisan kag Dumarao.
Suno kay Altavas nga sa napulo ka mga kaso sang nabiktima sang palupok, (9) diri ang mga kalalakinhan kag (1) ang babayi.
Ginpahayag man sini nga halos sa mga nabiktima sang palupok ang yara sa impluwensya sang makahulubog nga ilimnon magluwas lamang sa nalakip nga mga menor de edad.
Malipayon man sini nga ginpahibalo nga mas manubo ang numero sang mga biktima sang palupok sa kapareho nga period kun ikumparar sang nakaligad nga tuig.
Samtang, nagapadayon sa gihapon ang monitoring sang Capiz PHO humalin Disyembre 21, 2020 tubtob Enero 5, 2021.
