Nakapagkit ang Department of Health (DOH) sang 26 ka panibag-o ga kaso sang mga pilas bangud sa palupok sa bilog nga pungsod sadtong Huwebes, kung sa diin karun yara na sa kabug-usan nga 69 nga mga kaso.
Ginsuguran sang Department of Health ang pag-monitor sang mga insidente sang palupok sadtong Disyembre 22 subong nga tuig.
Sa datos sang ahensya, 58 sa mga biktima mga menor de edad nga may edad 19-anyos panubo, samtang ang nabilin nagapang-edaron sang 20-anyos pasaka.
Kadam-an man sang mga biktima mga kabataan ukon nagapanguna nga nagagamit sang mga palupok.
Suno sa ahensya, 86% sang mga ini ang nagamit sang illegal nga palupok kaangay sang “boga” ukon PVC cannon samtang 74% naman sang mga biktima aktibo nga nagagamit sang palupok sang natabo ang insidente kung sa diin 65 sa mga ini ang kalalakinhan kag 4 naman ang kababainhan.
Bangud sini, nagpaandam ang DOH nga ang paggamit sang palupok mahimo nga magdala sang seryuso nga epekto kaangay sang pagka-utod sang parte sang lawas, pagkabulag, pagkabungol, pagkahilo, paso, permanente nga sakit sa baga, kag mangin kamatayan.
Dugang pa sini nga masami nagataas ang kaso sa adlaw antes kag mismo sa pagsug-alaw sang Bag-ong Tuig.
Matandaan nga sadtong tinalikdan nga tuig, ginatos nga insidente sang mga firecracker-related injuries ang napagkit matapos ang selebrasyon sang Bag-ong Tuig.
