-- ADVERTISEMENT --

ROXAS CITY – Pilas sa ulo ang naangkon sang isa ka fish collector matapos nga ginlampusan sang 2×4 nga kahoy samtang nagakatulog sa isa ka payag takna 2:40 sang hapon, kahapon nga adlaw, Oktubre 23 sa Sitio Taytay, Barangay San Ramon Pilar.

Ginkilala ang biktima kay Charles Baclas, 33-anyos residente sang Sitio Bat-os sang nasambit nga barangay samtang ang suspek amu si Bethoven Bargo, 40-anyos, mangisngisda, residente sang Brgy. San Antonio, Pilar.

Sandig sa imbestigasyon sang Pilar MPS, samtang nagakatulog ang biktima hinali ini nga ginlampusan sang kahoy ni Bargo kag gilayon nga ginkuha ang sling bag sang biktima nga may unod nga P14, 104 nga kuwarta.

Ang nasambit nga insidente ang nasaksihan sang 7-ka tuig nga bata, kag gilayon nga nagpangayo sang bulig sa mga kaiping nga balay.

Natigayon naman nga nadakpan si Bargo ni Kagawad Jenefer Bañes sang Brgy San Ramon kaupod ang pila ka mga residente kag ginturn-over sa mga kapulisan.

-- ADVERTISEMENT --

Ginpadangat ang biktima sa Bailan District Hospital para sa pagbulong samtang nagapadayon ang imbestigasyon sang kapulisan angut sa insidente.