Gin-lift na sang Bureau of Fisheries and Aquatic Resources -Region 6 ang fishing ban sa bahin sang Visayan Sea.
Sa interview sang Bombo Radyo kay Director Remia Aparri sang Bureau of Fisheries and Aquatic Resources -Region 6, iya ginpahayag nga mahimo na liwat makapangisda sang sardinas, mackerel, kag herring matapos ang 3 ka bulan nga closed fishing season.
Suno kay Aparri, tinutuyo sang amo nga tikang ang masiguro ang bastante nga supply sang isda sa merkado bangud ang Visayan Sea ang ginakabig nga isa sa pinaka-produktibo nga fishing ground sa pungsod kag may daku nga papel sa food security.
Pahayag pa niya, ang pag-lift sang ban ginalauman man nga makapadugang sang kita sang mga manugpangisda kag makabulig sa lokal nga ekonomiya, samtang ginapadayon ang responsable nga pagpangisda pamaagi sang pagkuha sang nagakaigo nga permit.
Nagpanawagan man ang opisyal sa mga manugpangisda nga magsunod sa mga regulasyon kag magkooperar sa pagpreserbar sang kadagatan para sa padayon nga kauswagan sang industriya sang pangisdaan.
INTERVIEWED BY: BOMBO ROADNIE DABAN DALANON
