DAO, CAPIZ – Ginpahayag ni Mayor Jimbo Barruela sang Dao, Capiz nga well-implemented ang mga flood control projects sa ila nga banwa.
Suno kay Mayor Barruela, halos tapos na ang tanan nga flood control projects kag antes ini ginpatuman nag-agi anay sa koordinasyon sa Department of Public Works and Highways (DPWH) Capiz.
Dugang pa sang natungdan, hugot niya nga gina-monitor ang projects agud masiguro ang kalidad kag tama ang implementasyon sang mga proyekto.
Pahayag pa sang alkalde, ang mga flood control projects nakabase sa program of works kag husto nga napatuman sang DPWH. Gindisenyo ang mga ini agud makontrol ang pag-awas sang tubig kag indi maapektuhan ang plaza kag iban pa nga bahin sang banwa.
Ginhatagan sang pagtamod ni Barruela nga importante ang insakto nga pagpatuman sang proyekto agud indi mauyang ang pondo sang pumuluyo.
Bilang alkalde kag isa ka Engineer, ginpasalig ni Barruela nga personal niya nga ginabantayan ang mga proyekto agud masiguro nga mapuslan ini sang mga pumuluyo.
Kalakip sa mga flood control projects sa Dao, Capiz ang mga masunod:
- Construction of River Control along Panay River Basin
Location: Barangay Poblacion Ilawod, Dao, Capiz
Contractor: MEGAGOLD Construction and Development, OPC
Cost: ₱24,490,880.97
Completion Date: Mayo 16, 2024
- Construction of River Control along Panay River Basin
Location: Barangay Poblacion Ilaya to Barangay Poblacion Ilawod, Dao, Capiz
Contractor: A.D. Pendon Construction & Supply, Inc.
Cost: ₱71,409,709.04
Completion Date: Hunyo 29, 2024
