Ginkumpirmar sang Commission on Elections (COMELEC) nga permanente nga gin-disqualify ang isa ka Former Municipal Councilor sa banwa sang Dumarao, Capiz.
Ini matapos nga makaduha ka beses nga napaslawan ang amo nga anay opisyal sa pagsumiter sang iya Statements of Contributions and Expenditures ukon SOCE.
Sa interview sang Bombo Radyo kay Atty. Wil Arceño, Assistant Regional Director sang COMELEC Region 6, iya ginpahayag nga wala nakasumiter sang iya SOCE ang anay municipal councilor sa 2019 kag 2022 National and Local Elections.
Suno kay Arceño, bilang kabahin sang due process, ginpadal-an sang sulat ang anay opisyal agud makahatag sang iya explanation, apang napaslawan ini sa pagsabat sa sulat sang komisyon.
Nahibaluan nga sa idalum sang Omnibus Election Code, kinahanglan sang mga kandidato nga magsumiter sang ila SOCE sa sulod sang 30 ka adlaw matapos ang eleksyon.
