Temporaryo nga nakaguwa sa presohan si anay Senador Ramon “Bong” Revilla Jr matapos nga nakapiyansa sang ₱1 million para sa kaso nga malversation nga iya ginapangatubang.
Gin-aprubahan sang Sandiganbayan Third Division ang iya petisyon para sa provisional liberty samtang nagapadayon ang trial.
Suno sa desisyon sang korte, gintugutan siya nga magpiyansa bangod napaslawan ang prosecution sa pagpresentar sang mabakod nga ebidensya.
Matandaan nga nagapangatubang si Revilla sang panumbungon nga graft kag malversation may kaangtanan sa ginaalegar maanomaliya nga ₱92.8-million nga “ghost flood control project” sa Pandi, Bulacan, kon sa diin makapila na sini nga ginpanginwala ang anuman nga kahilabtanan.
Ang petisyon lang ni Revilla ang ginpahanugutan, samtang ginbalibaran sang Sandiganbayan ang mga aplikasyon para sa piyansa sang iya kaupod nga akusado.
Una na nga nagpiyansa si Revilla sang ₱90,000 para sa separado nga kaso sang graft nga pending sa Fourth Division. Sa pag-aproba sang iya ₱1-million nga piyansa para sa panumbungon nga malversation, nakaguwa na ini.
Nagpasalamat naman ang anay senador sa Ginoo kasunod sang desisyon sang anti-graft court division.
