Gin-abswelto na sang Sandiganbayan si Juan Ponce Enrile, anay Senate President kag current Chief Presidential Legal Counsel, sa kaso sang graft may kaangtanan sa kontrobersyal nga pork barrel scam.
Sa ginpaguwa nga resolusyon sang Sandiganbayan, ginkumpirmar ang pag-abswelto kay Enrile, subong man sa iya anay chief of staff nga si Gigi Reyes.
Matandaan nga sang 2015, gintugutan sang Korte Suprema nga mahatagan sang piyansa si Enrile sa humanitarian grounds, isa ka kontrobersyal nga lihok nga ginsulat ni anay Chief Justice Lucas Bersamin.
Sa ila motion for reconsideration, gin-insister sang mga piskal ang testimonya sang mga yabi nga saksi nga sanday Benhur Luy kag Ruby Tuason.
Apang, ginmintinar sang Sandiganbayan nga kulang ang ebidensya agud pamatud-an ang pagkunsabo kag pagpang-agaw nga kinahanglanon sa isa ka kaso nga plunder.
Sa pag-abswelto kay Enrile, kumpleto na ang trio sang mga anay senador nga involved sa pork barrel scam nga na-abswelto nga ginalakipan nanday anay Sen. Bong Revilla kag Sen. Jinggoy Estrada.
Sa bug-os nga proseso, si Enrile lamang ang wala nakaeksperyensya sang aktwal nga pagkakulong, kundi sa baylo nagpabilin sa ospital nga aresto antes ginhatagan sang temporaryo nga kahilwayan.
Nahibaluan nga yara sa ospital si Enrile sang naggwa ang desisyon, sa diin gin-monitor lamang ini pinaagi sa video conference.
