Pabor si FPJ Panday Bayanihan Party-list Representative Brian Daniel Poe sa temporaryo nga pag-suspend sang Excise Tax sa petrolyo.
Sa interview sang Bombo Radyo kay Representative Poe, iya ginpahayag nga kinahanglan nga tan-awon sang gobyerno ang kahimtangan sang mga pumuluyo sa pungsod sa padayon nga pagsaka sang presyo sang gatong sa world market bangud sang nagapadayon nga tensyon sa Middle East.
Suno kay Poe, ang pag-suspend sang excise tax ang makabulig agud indi mangin mabug-at para mga sektor nga direkta nga maapektuhan sang pagsaka sang presyo sang gatong kaangay sang mga motorista, mangunguma kag manugpangisda.
Apang, gin-athag man ni Representative Poe nga may epekto man sa koleksyon sang gobyerno sa tion nga aprubahan ang temporary nga pag-suspend sang excise tax ilabi na sa mga programa nga ginapondohan sini.
Dugang pa sang natungdan, importante nga tun-an ang nasambit nga tikang agud gilayon nga makapahagan-hagan sa krisis nga ginapangatubang sang pungsod Pilipinas.
