Nagpapapanaog sang sanction ang China batuk kay anay senador Francis Tolentino pinaagi sa pagbawal sa iya nga makasulod sa Mainland China, Hong Kong, kag Macao bangud sa iya mga malain nga pahayag kag tikang ni Tolentino angut sa mga isyu nga may kahilabtanan sa China nga nagapalain sa interes sang nasambit nga pungsod kag sa relasyon sa Pilipinas.
Ini ang gin-anunsyo sang Spokesperson sang foreign ministry sang China isa ka adlaw matapos magtakop ang termino ni Tolentino bilang senador sang Pilipinas.
Ginpahayag sang Spokesperson nga ipakigbato sang Chinese government ang pungsudnon nga soberanya, seguridad, kag mga interes sa kauswagan, sa pihak sang mga pahayag gikan sa ginatawag nga mga anti-China nga politiko sa Pilipinas.
Bilang sabat, gin-ako ni Tolentino ang mga sanctions nga ginpapanaog sa iya kag gintawag ini nga isa ka “badge of honor.”
Nahibaluan nga si Tolentino ang nag-sponsor sa Senado sang Philippine Maritime Zones Act, isa ka layi nga nagapahayag nga ang Maynila ang nag-exercise sang soberanya kag hurisdiksiyon sa mga internal waters, teritoryal nga dagat, archipelagic waters, airspace, lakip na ang seabed kag subsoil.
Ini nakasandig sa United Nations Convention on the Law of the Sea (UNCLOS) kag iban pa nga mga layi kag kasugtanan.
Sakop sini ang contiguous zone sang Pilipinas, nga nagatumod sa mga tubig nga lagpas kag kalapit sang teritoryal nga dagat sini, tubtob 24 nautical miles gikan sa mga baseline. Gin-define pa sini ang exclusive economic zone, continental shelf, kag extended continental shelf nga kabahin sang teritoryo sang Pilipinas.
Ginhatagan man pagtamod sang layi nga ang Pilipinas ang may kinamatarong kag pribilehiyo sa mataas nga dagat kag ang internasyonal nga seabed sandig sa nakasaad sa UNCLOS kag iban pa nga naga-exist nga mga layi kag kasugtanan.
May kaangtanan sini, ang tanan nga maritime scientific research sa mga maritime zones sang pungsod ang makabenepisyo sang dako sa interes sang mga Pilipino.
Nagkomento man si Tolentino nga ang mga espiya gikan sa China ang “naka-embed” sa burukrasya sang pungsod.
