ROXAS CITY – Nagapanawagan sang hustisya ang mga katapo sang progresibo nga grupo Gabriela-Capiz para sa lady rider/looper nga biktima sang ginaalegar pagpanghimulos.
Suno kay Monica Cabantug, chairperson sang nasambit nga organisasyon, nagakadapat protektahan sang gobyerno ang mga kababainhan bangud maluya ang mga ini.
Dugang pa sini, kun indi mahatagan sang hustisya ang ginaalegar pagpanghimulos sa pangayaw nga biktima, posible nga makatuga sang malain nga imahe sa aton probinsya ang amu nga insidente.
Nagpabutyag man sang pagsuporta ang grupo sang Gabriela-Capiz sa 37-anyos nga lady rider/looper victim kag hugot nga ginkondenar ang ginaalegar pagpanghimulos sa nasambit nga babayi.
Matandaan nga ginatudlo suspek si EJ Contreras, ang nagapadalagan sa pagka-SB member sa banwa sang Pontevedra, apang suno sa malapit nga abyan sini nga indi mahimo sang amu nga persona ang amu nga alegasyon.
