ROXAS CITY – Balik-karsel ang isa ka gabunan nga kawatan matapos nga nakuhaan sang CCTV footage ang aktwal nga pagsulod kag pagpangawat sini sa isa ka puluy-an sa Barangay Hanglid, President Roxas, takna 11:30 sang aga, Oktubre 17.
Ginkilala ang suspek kay Kent Torres Villanueva, residente sang Brgy Libas, Roxas City apang temporaryo nga nagapuyo sa Brgy. Lantangan Pontevedra.
Sa interview sang Bombo Radyo kay Sarah May Salaya, biktima, wala ini nagalaum nga sudlon sang makawat ang iya puluy-an sa kaaganhon kag live-in partner pa sang iya himata ang suspek.
Pahayag sini nga nakuha ni Villanueva ang P3,050 nga kuwarta kag isa ka tablet.
Natigayon naman nga madakpan sang kapulisan si Villanueva matapos nga nakilal-an sang isa ka pumuluyo ang lalaki pinaagi sa ginpost nga CCTV footage ni Salaya sa social media.
Suno kay Salaya, ginpanginwala pa sang suspek ang pagpangawat apang nakuha sa posesyon sini ang tablet nga ginkawat.
Matandaan nga dati nga nakulong ang suspek sa kaso man nga pagpangawat apang sang tuig 2021, dakup sa entrapment operation sang CIDG-Capiz si Villanueva kag nakuha sa posesyon sini ang .38 revolver nga armas-luthang.
Desidido naman nga magpasaka sang nagakaigo nga kaso si Salaya batuk kay Villanueva samtang nagapabilin ini sa karsel sang President Roxas MPS para sa nagakaigo nga disposisyon.
