Napasakaan na sang kaso ang ginakabig gabunan nga kawatan sa syudad sang Roxas, matapos ini nga madakpan sa ginkasa nga buybust operation sang kapulisan, sa Barangay Banica, syudad sang Roxas.
Matandaan nga ginkilala ang nadakpan kay alyas “Siping”, 27-anyos kag residente sang McKinley Street, Barangay 1, Roxas City.
Sa pagpakig-angut sang Bombo Radyo kay PLTCOL. Lumyaen Lidawan, Officer In Charge sang Roxas City PNP, ginpahayag nga napasakaan na sang kaso nga paglapas sa RA 10591 ukon Comprehensive Firearms and Ammunition Regulation Act kag paglapas sa Batas Pambansa bilang 881 ukon Omnibus Election Code of the Philippines kaangut sa Comelec Resolution No. 11067 ukon Comelec Gun Ban si alyas “Siping”.
Nagpasaka man sang kaso ang isa sa mga biktima sa pagpangawat batuk sa nasambit nga suspetsado.
Mahibaluan nga si alyas “Siping” ang ginhingadlan nga gabunan nga kawatan sa syudad sang Roxas bangud madamo na ini sang nabiktima.
Samtang, ginaganyat naman ni PLTCOL. Lidawan ang mga nabiktima sini nga magpasaka na sang kaso batuk kay alyas Siping.
