ROXAS CITY – Nagaamat-amat na padulong sa opisina sang isa ka Abugado nga Board Member ang mga investors sang naga kinalain-lain nga mga investment schemes diri sa Probinsiya agud magpabulig nga mag file sang complaint batuk sa mga ginaalegar CEO.
Ini ang gin kompirmar ni Second District Board Member Eleuper “Bulilit” Martinez sang mainterview sang Bombo Radyo.
Suno kay Martinez nga gamay pa lang kutob sa karun ang naga padulong sa iya opisina, bangud posible nagahulat pa ang mga ini sang pay-out.
Wala man suno diri niya ginapilit nga magpasaka sang kaso batuk sa ila CEO ang mga investors.
Kalabanan nga naga padulong sa iya opisina, amu ang mga investors sang RGS Online Marketing, apang gina panginwala naman sang ginapahayag opisyal nga si certain “Cyril” nga indi sila Investment scheme kundi isa sila ka networking company.
Nagapati man ang nasambit nga Board Member nga wala na tiyansa nga maka pay-out pa ang yara sa 25 days double your money investment scheme.
Nagapabilin naman nga bukas ang opisina ni Martinez sa mga investors nga luyag pa gid magreklamo apang ginaklaro niya diri nga limitado lamang ang iya serbisyo, kag ini amo ang pagdihon sang “judicial affidavits” sang tagreklamo bangud nga ang City Prosecutor’s Office na ang magaatubang sa korte kun maipasaka na ang panumbungon.
