ROXAS CITY – Ginsarado na ang gate sang Capiz Villareal Stadium nga amu ang venue sang educational assistance payout para sa mga indigent nga mga estudyante gikan sa Department of Social Welfare and Development (DSWD) bangud sa indi na masarangan ang kadamuon sang tawo.
Mahibaluan nga kalabanan sa mga nagkaladto ang gikan pa sa 2nd district nga mga banwa, gani ginatinguhaan sang DSWD Capiz nga maakomodar nila ang kutob sang ila masarangan.
Ginabulubanta 3,000 ka mga indibwal ang nagpadulong diri kag wala naman nagahalin ang iban nga nakapila sa ila pila apisar nakabatyag na sang gutom kag lingin sang ulo bangud man mabudlay na makabalik ukon makasal-ot kun maglakat pa agud magkaon.
Bangud diri, may nabalhag na nga 6 ka mga estudyante nga nagkalalipong kag masuwerte naman nga may mga medical responders kag ambulansya kun sa diin gindapatan ang mga ini sang una nga pagbulong rason nga nag-ayo na ang ila pamatyag.
Matandaan nag-anunsyar na kaina sang aga si Mrs. Josephine Degala sang DSWD nga indi na magdayon kadto ang wala pa nakaabot sa venue kag magpadulong na lamang sa liwat sa masunod nga Sabado.
