ROXAS CITY, CAPIZ – Ginasiguro sang Department of Trade and Industry nga bastante ang school supplies sa Western Visayas para sa nagahilapit nga pagbukas sang klase sa Hunyo 16.
Sa interview sang Bombo Radyo kay Merian Asas, Officer-in-charge Provincial Director sang Department of Trade and Industry-Capiz, iya ginpahayag nga padayon ang monitoring sang ahensya sa mga ginabaligya nga school supplies sa probinsya.
Suno kay Asas, may yara sang 425 ka mga stock keeping units sa Capiz sa diin 195 diri ang may yara sang price guide.
Lakip sa mga stock keeping units amo ang notebook, papel, lapis, ballpen, crayors, eraser, rules kag sharpener.
Pahayag niya, nagtaas ang numero sang stock keeping units sa Capiz subong nga tuig kun ipaanggid sa 173 lang sang 2024.
Dugang sang natungdan, ang price guide ginpaguwa sang ahensya agud proteksyonan ang manugbakal sa diin may yara sang ginasunod nga presyo.
Nagpanawagan man ang Provincial Director sa manugbakal nga mag-canvass anay sang mga school supplies agud mapaanggid ang kalidad sang produkto.
