Yara na sa Regional Target List ang ginakabig High Value Individual nga nadakpan sa ginkasa nga drug buybust operation sa Barangay Poblacion Elizaldy, President Roxas, Capiz.
Matandaan nga ginkilala ang nadakpan kay alyas “Mark”, 41-anyos kag residente sang nasambit nga lugar.
Sa interview sang Bombo Radyo sa Asst. Provincial Officer kag Team Leader sang PDEA Capiz nga si IO2 Rodito Lobaton Jr., ginpahayag sini nga masami nagapatigayon sang illegal nga aktibidad ang nadakpan sa bahin sang Estancia Iloilo, Lutod-Lutod kag iban pa.
Suno kay Lobaton, nakuha sa paghinakop ni alyas “Mark” ang 10 tanan ka sachets kag isa ka dako nga plastic sang gina-alegar nga iligal nga droga nga may kabug-aton nga 70 gramos kag may standard drug price nga kapin P700,000.00, P13,000 nga buybust money kag boodle money, coin purse nagaduag brown, kag isa yunit sang salakyan nga nagaduag naman sang itom.
Dugang pa sang opisyal nga nagtuyo pa kun tani nga magpalagyo ang nadakpan apang maswerte na lamang nga sa bulig sang mga tropa natigayon ini nga madakpan sa iya mismo puluy-an.
Kaso nga paglapas sa Republic Act 9165 ukon Comprehensive Dangerous Drugs Act of 2002 ang igapasaka sang otoridad kay Mark.
Sa karon, nakahunong na ini sa karsel sang PDEA-Capiz para sa nagakaigo nga disposisyon.
