ROXAS CITY – Dakop ang ginakabig nga lider sang Igabon Platoon Central Front Committee kilusang Rehiyong Panay, New People’s Army (CPP-NPA) pinaagi sa gahum sang Warrant of Arrest nga ginserbi sang mga otoridad sa 30-1st Brigade, 12-IB kag katapo sang Maayon PNP sa Sitio Insiwalan, Barangay Tapulang, sa banwa sang Maayon.
Ginkilala ang akusado nga si Francisco Balois, 65-anyos ukon mas kilala kay Ka Tonying kag residente sang Brgy. Katipunan, Tapaz, Capiz.
Sa nakuha nga impormasyon sang Bombo Radyo Kay PMAJ.Syril Punzalan Hepe sang Maayon PNP, naglab-ot naman sa halos 3 ka bulan ang pagmonitor nila sa hulag kag aktibidad sang nasambit nga akusado. Nahibaluan nga nagkadto sa nasambit nga barangay si Ka Tonying para nga magbisita sa iya himata.
Narekober sa paghinakop ni Ka Tonying ang isa ka granada, isa ka unit sang .45 caliber pistol, anum (6) ka magazine lakip ang mga bala sang armas luthang.
Dugang pa ni PMAJ. Punzalan, si Ka Tonying wanted man sang sampaw nga kaso kasubong sang murder, extortion, rebellion, illegal possesion of firearms kag madamo pa.
Sa karon, nakahunong na ini sa karsel sang Maayon MPS kag natalana nga igaturn-over sa court of origin.
