ROXAS CITY – Pormal na nga napasakaan sang kaso ang isa ka babayi nga ginkasahan sang search warrant sang gintingob nga pwersa sang CIDG Capiz kag Roxas City PNP sa Happy Homes Subdivision, Barangay Sibaguan, Roxas City.
Matandaan tatlo ang subject sa nasambit nga search warrant apang isa lamang ang yara sa lugar sang insidente sang Setyembre 2.
Ginkilala ang naaresto kay Lenilyn Custorio Jaynos alias “Sadra” ukon “Elizabeth” samtang ang duwa amu sanday Cirila Cordon Estrada alias “Cora” ukon “Sheila Gonzales”, kag Marivie Bartolome Arguilles.
Nakuha sa posesyon ni Jaynos ang 2 ka granada, 2 ka calibre .45 nga armas-luthang kag kapin 82 ka mga bala sini.
Ginapahayag nga pareho mga miyembro sang Regional Finance Staff ang tatlo ka subject kag naga-operate sa bug-os nga Panay.
Nakuha man ang listahan sang mga negosyante kag business establishments nga ginakil-kilan sang grupo nanday Alias Sandra.
Suno pa sa natungdan, dala si Alias Sandra sa lista sang mga katapo sang New People’s Army-National Democratic Front (CPP-NPA-NDF) nga nagapangilkil sa urban areas.
Nagapangatubang sa kaso nga paglapas sa RA 9516 ukon “Illegal possession of explosives” kag RA 10591 ukon “Comprehensive firearm and ammunition act” ang suspetsado.
Sa karon, si Jaynos ang yara sa kustodiya sang Roxas City Police Station para sa nagakaigo nga disposisyon.
