ROXAS CITY – Narekober sa paghinakup sang soltero ang Kawasaki Bajaj nga motorsiklo nga una na nga ginreport missing sang tinalikdan nga Hulyo 17, 2023, takna 9:15 kaina sang aga sa Bayot Drive, Barangay IX, Roxas City.
Ginkilala ang arestado kay Joseph Cariño Dela Peña, 22-anyos, residente sang Barangay San Jose, sini nga syudad.
Sandig sa impormasyon nga nagikan sa Roxas Component City Police Station, nakit-an ni Police Senior Master Sergeant Cristofer Dinglasan ang isa ka motorsiklo nga daw kasubong sang ginreport nga missing sang tinalikdan lang nga adlaw.
Gani, gilayon ini nga nagtawag sa RCCPS para sa pagberepika, natukiban nga ang nakit-an nga Bajaj motorsiklo ni Dinglasan amu man ang motorsiklo nga ginkawat sa Barangay Loctugan.
Matandaan nga, ginpanawagan sang tag-iya nga si Berwil Aranzado ang nadula sini nga tricycle kag sa amu man nga adlaw nakit-an ang gin-abandona nga side car apang wala na ang motorsiklo.
Sa nakuha nga impormasyon sang Bombo Radyo, nahibaluan nga nagpadulong sa Bayot Drive ang arestado agud kuntani ibaligya ang kinawatan nga motosiklo.
Sa karon, yara na sa paghinakup sang Roxas City PNP si dela Peña para sa nagakaigo nga disposisyon.
