Ginkumpirmar mismo ni Dumarao Mayor “Matt” Hachuela nga tatlo ka mga empleyado sini ang nagpositibo matapos nga nagpatigayon sang random drug test sa munisipyo sang Dumarao.
Sa interview sang Bombo Radyo kay Mayor Hachuela, ginpahayag sini nga nagapatigayon man ini sang tuigan nga random drug testing para sa mga empleyado kag ginpakamaayo sini nga sa embukada palang sang tuig suguran na ang nasambit nga drug testing.
Dugang pa sini nga ang ginhimo nga random drug testing ang kasunod man sa pagkadakop sa ginapahayag nga empleyado sang munisipyo sang Dumarao sa ginpatigayon nga drug buy-bust operation sang Dumarao PNP sang tinalikdan nga Enero 8 sini nga tuig apang ginpanginwala man ni Hachuela nga empleyado nya ini kag gin-athag nga regular employee ini sang LGU-Dumalag nga nagaistar sa Dumarao.
Wala gin-ekspektar ni Hachuela nga maga-positibo ang mga ini bangud maayo man suno ini nga mga empleyado.
Dugang pa sini, nagpadulong naman ang tatlo ka nagpositibo nga mga empleyado kag personal nga nagpangayo sang pasaylo sa iya.
Samtang, nagpasa naman ang regular employee sang voluntary resignation, samtang ang empleyado naman sang kapitolyo, ginhimuan na sang memorandum kun sa diin ginakanselar ang detailed order sini kag igabalik ini sa Provincial Capitol kun sa diin ini ang magadesisyon kun magapadayon pa ini sa iya trabaho. Ang job hire, posible nga indi na pag-i-renew ang iya nga kontrata.
Dugang pa sang alkalde, padayunon pa sini ang pagpatigayon sang surprise random drug testing sa mga empleyado sang munisipyo.
Mensahe ni Mayor Hachuela sa tanan nga empleyado sang LGU-Dumarao, permi panumdumon nga magbinuligay, magtrabaho sang maayo para sa banwa kag likawan nga maghimo sang mga malain nga mga hilikuton.
