PRESIDENT ROXAS, CAPIZ – Gina-validate na sang kapulisan kun ano ka matuod ang ginpahayag ni President Roxas Mayor Receliste Escolin nga pagpamahog sa iya kabuhi.
Matandaan nga sang damlag lang gintuad ni Escolin nga may nabaton ini nga death threat.
Sa interview sang Bombo Radyo kay Pres. Roxas Municipal Police Station Chief Police Major Alfred De Leon, nagpa-blotter sa ila talatapan si Mayor Escolin angut sa ginapahayag sini nga pagpamahog sa iya kabuhi.
Suno kay De Leon nga gina-assess na ini sa karon sang Pres. Roxas PNP kun ano ka matuod kag kun sin-o ang mga persona nga yara sa likod sang pagpamahog sa kabuhi sang alkalde.
Pahayag pa sini nga indi pa sila makahatag sang security detail kay Escolin bangud may memorandum nga nagabawal.
Dugang pa ni De Leon mahimo suno diri maka-request ang nasambit nga alkalde pinaagi sa pagpadala sang letter sa PNP Provincial Director kun luyag sini maka-avail sang Police Security and Protection Group nga amu ang in-charge sa mga pulitiko apang nakadependi ini sa resulta sang assessment sang Pres. Roxas PNP kun pila kabilog nga personnel ang igahatag kay Escolin.
Mahibaluan suno kay De Leon nga yara sa yellow category ang banwa sang President Roxas nga kun sayuron intense ang political rivalry kag preparado suno diri ang kapulisan ilabi na nga nagahilapit ang 2025 local and national elections.
