Nangin matalunsay ang ginpatigayon nga demolisyon sa 11 tanan ka mga apektado nga mga panimalay sa Barangay Hanglid, banwa sang President Roxas.
Nahibaluan ginsuguran na ang demolition sa nasambit nga lugar alinsunod sa Court Order nga ginpaguha sang korte sa mga apektado.
Sa interview sang Bombo Radyo kay PMAJ Alfred de Leon, Officer-in-Charge sang President Roxas Municipal Police Station, ginpahayag sini nga wala naman sang may nagpugong ukon nagpamalibad nga mga apektado nga mga residente kun sa diin natalana nga gub-on ang tagsa ka mga panimalay sang mga ini.
Ginkasubo naman sang mga residente ang desisyon sang korte bangud nagapati ang mga ini nga ang lote nga ginatindugan sang ila nga mga panimalay ang iya sang gobyerno kag indi iya sang Capiz Sugar Central Inc.
Nahibaluan nga ang nasambit nga demolition ang magadugay sang lima ka adlaw.
Ang mga apektado nga mga residente ang wala ma-qualified sa relocation program, bangud napamatud-an nga indi ini mga indigent residents sang nasambit nga barangay.
Samtang, wala man nagkulang si Pres. Roxas Municipal Mayor Receliste Escolin sa pagbulig sa mga residente apang ang korte na mismo ang nagpaguha sang nasambit nga court order.
