Nangin matalunsay kag generally peaceful ang ginhiwat nga fluvial parade kadungan sa pagselebrar sang kapistahan sang San Juan Bautista sa Barangay Baybay sining syudad.
Ini ang nangin pahayag ni Coast Guard Senior Chief Petty Officer Arnel Nisola, Deputy Commander for Operations sang PCG-Capiz sang ma-interview sang Bombo Radyo.
Suno kay Nisola, bag-o paman ang selebrasyon sang kapistahan sang San Juan Bautista ang presensya sang mga katapo sang PCG Capiz ang hugot nga nakamonitor kag nakadeployed na sa tagsa ka mga baybayon sa syudad sang Roxas.
Mahibaluan nga yara sa 48 ka mga personnel sang PCG-Capiz ang nakadeployed kasubong man ang iban pa nga personnel nga nag-augment agud mas mabantayan pa ang tanan nga mga baybayon bangud indi lamang sa syudad sang Roxas ang nagpatigayon sang Fluvial Parade rason nga kinahanglan sang mas madamu nga mga katapo sang Coast Guard.
Pahayag pa ni Nisola, nga wala naman sang mga major incident sa adlaw mismo sang selebrasyon sang San Juan kag sa kabug-usan nangin generally peaceful ini.
Dako naman suno nga bulig sa ila ang ila ginhimo nga pagpanagtag sang early flyers kag hugot nga pahanumdom sa mga tawo kasubong man sa mga tag-iya sang mga resort.
Nagpasalamat man si Nisola sa tanan nga mga nagbulig sa ila sa pagpatigayon kag mapabilin nga mangin matalunsay ang amu nga selebrasyon, ilabi na sa mga Barangay Officials kag iban pa nga mga rescue teams.
