DUMARAO, CAPIZ – Aminado ang bata sang alkalde sa banwa sang Dumarao nga may mga ihambal ang mga tawo sa iya pagpadalagan sa pagka-bise alkalde sa ila banwa kay wala ini sang background sa pulitika kag amay sini ang nagapungko nga Mayor.
Sa interview sa Bombo Radyo kay Gley Hachuela, iya ginarespeto ang mga komento nga ihambal sang tawo kag naintindihan gid sila sa ila nga mga opinyon nga mag-amay ang magapapili sa ila banwa sa masunod nga eleksyon.
Pagklaro ni Gley nga wala ini ginpilit ukon basta nalang nga ginbutang sa amu nga posisyon sa rason nga bata ini sang alkalde kundi siya ang may kagustuhan nga magpadalagan kag magsulod sa pulitika para magserbisyo kag mabuligan ang iya mga constituent.
Suno pa kay Gley nga yara na ini sa likod sang iya nga amay sumugod nga nagpangalagad ini sa ila banwa kag kabahin sang mga plano para sa ikaayo sang mga pumuluyo.
Mas labi pagid sini nga nakita nga kinahanglan sang iya amay sang timbang para mabuligan ang mga pumuluyo sa ila banwa sang nagapadulong ini sa mga kabarangayan para makita ang ila sitwasyon.
Sa nagligad pa nga tuig nag-umpisa kadto sa mga barangay si Gley nga wala nagapaupod sa iya amay kag boluntaryo niya ini nga ginahimo sa kada adlaw sang Sabado kag Domingo.
Pag-abot naman sa kakulangan sang eksperyensya sa pulitika, nagapati naman ini nga mahibaluan niya ini kay willing siya nga magpamati kag magtuon kun anu ang mga nagakadapat nga buhaton.
Dugang pa ni Hachuela nga sa iya kagustuhan nga magserbisyo sa pumuluyo kag ikasarang nagapati ini nga amu ang rason kun ngaman gin-indorso ini sang Gobernador kag mga kapitan sa ila nga banwa.
Madamo sang mga programa nga luyag sini maimplementar sa ila nga banwa kag nagapati nga mahatag ini sa mga pumuluyo sa ila pagbinuligay nga mga opisyal.
