ROXAS CITY – Ginkumpirma ni Governor Esteban Evan Contreras nga kalakip ini sa mga na-imbitahan sa isa ka dinner ukon panyapon kaupod si President Rodrigo Duterte sa Palasyo sang Malakanyang.
Suno sa gobernador nga malipayon ini bangud nahatagan sang kahigayunan nga maka-estorya ang presidente.
Magluwas kay Governor Contreras nga amo lamang ang imbitado sa Rehiyon 6, may pila man ka mga kongresista, alkalde kag gobernador sa Luzon kag Mindanao nga nagtambong.
Ginpalab-ot ni President Duterte sa mga nagtambong nga kulang ang anum ka tuig nga pagpanerbisyo sa pumuluyong filipinhon sa mga pagbag-o kag proyekto nga luyag sini nga ipatuman.
Aminado man ang opisyal nga naestoryahan ang isyu sa pulitika sa diin ginpalab-ot sini ang pagpadalagan nga independiente sang nagligad nga eleksyon kag wala pag-upod sa anuman nga partido agud wala sang mangin committement sa national level.
Ginhingalitan man ni Governor Contreras ang kahigayunan nga makapasalamat kay President Duterte sa mga ginbulig kag ginhatag nga proyekto sa probinsiya sang Capiz kalakip ang 1 billion pesos nga pondo para sa nagkalain lain nga proyekto nga iga-implementar sini nag tuig.
Magluwas sa mga karsada mahatagan na sang katumanan ang pinakadaku nga evacuation kag convention center sa Visayas diri sa probinsiya sang Capiz kalakip ang konstruksyon sang 5 storey building hospital.
Ginasigahum man ang pagatukuron nga dam sa probinsiya kalakip ang Panay River Basin incorporated nga makabulig sang daku pag-abot sa irigasyon, pagbaha, hydro electric power plant kag iban pa.
Malipayon man nga ginpalayag sang gobernador ang pagpasiguro sang pila ka mga investors nga handa mag-invest sang negosyo sa Capiz.
Samtang epektibo sa Abril 25 madugangan naman ang mga biyahe sang eroplano sa probinsiya matapos nagpasiguro ang tagdumalahan sang Air Asia.
