Nakuha na sang mga militar ang gobyerno sang Madagscar matapos ma-impeach si President Andry Rajoelina sang mga mamalidha kag ginpwersa nga magbiya sa pungsod.
Sa iya pamulong-pulong sa guwa sang palasyo sang presidente, ginpahayag ni CAPSAT chief Col. Michael Randrianirina nga magaporma sang gobyerno ang militar kag magahiwat sang eleksyon sa sulod sang duha ka tuig.
Suno sa iya, ila man bungkagon ang mga demokratiko nga institusyon kaangay sang Senado, High Constitutional Court, High Court of Justice, High Council for the Defence of Democracy and Rule of Law kag Independent National Electoral Commission.
Samtang, ginsaulog sang mga soldado kag mga nagaprotesta ang pagpahalin kay Presidente Rajoelina, sa diin linibo ka mga tawo ang nagwagayway sang ila mga bandera sa kapital sang Antananarivo.
Nahibaluan nga ang CAPSAT ukon Personnel Administration and Technical and Administrative Services Corps, amo ang pinakamabaskog nga yunit militar sa pungsod sang Madagascar.
