Nakahanda ang gobyerno sang Pilipinas nga buligan ang mga Pilipino nga apektado sang lapnagon nga wildfire sa Los Angeles, California, USA.
Suno kay Department of Foreign Affairs (DFA) ASec. Adelio Angelito Cruz, madamo nga mga Pilipino sa LA ang ginpaidalom na sa mandatory evacuation kag ginatinguhaan na sa karon nga makontak ang mga ini agud mahibaluan ang ila nga sitwasyon pinaagi sa tanan nga posible nga mga pamaagi.
Ginhimo sang opisyal ang pahayag kasunod sang pag-apelar sang bulig sang pila ka mga Pilipino kag Filipino-Americans nga yara sa LA.
Nag-isyu naman ang Philippine Consulate General sa Los Angeles sang advisory nga nagaabiso sa Filipino community sa mga apektado sang wildfire sa LA nga makig-angut sa Konsulada para sa nagakaigo nga bulig ukon magtawag sa (323) 528-1528 kag magsunod sa evacuation orders.
Sa karon nakig-angut na ang Konsulada sa mga local authorities kag hugot nga nakabantay sa sitwasyon sang mga Pilipino sa mga apektado nga lugar.
