Ginsaway sang North Korea ang plano ni US President Donald Trump nga mag-angkon sang Golden dome missile shield nga nagatuyo nga ma-weaponize ang kahawaan.
Kaangut sini, nag-isyu ang Foreign Ministry sang NoKor sang isa ka memorandum kun sa diin gintawag sini ang sistema nga tuman ka delikado nga inisyatibo nga nagatuyo nga magpamahog sa estratehiko nga seguridad sang mga nuclear weapons states.
Gin-akusaran man sang NoKor ang US sang pagiging desperado sini nga ma-militarize ang outer space.
Dagdag pa sini nga ang plano sang US nga magtukod sang bag-o nga missile defense system amu ang puno kag ikog sang pag-tuga sang pangkalibutanon nga nuclear kag space arms race sa tunga sang pagbuhay sang security concerns sa mga nuclear weapon states kag himuon nga isa ka potensiyal nga nuclear war field ang outer space.
Magluwas sa NoKor, nagpalab-ot man sang madamo nga pagpamalabag ang China sa plano sang Amerika kag gin-akusaran sang pag-guba sa global stability.
Nauna na nga gin-anunsiyo ni Trump ang mga bag-o nga detalye kag inisyal nga pagpondo para sa missile shield system sang nakaligad nga semana kag ginsiling nga tuman ka importante sini para sa kadalag-an kag survival sang ila nga pungsod.
