ROXAS CITY – Wala sang problema sa gobernador sang probinsya kun luyag ipakakas sang Sangguniang Panlalawigan sa Provincial Development Council (PDC) ang tinaga nga “Kabalaka” sa mga proyekto para sa Capiz.
Ini ang ginpahayag ni Governor Esteban Evan “Nonoy” Contreras, sang mainterview sang Bombo Radyo.
Matandaan nga ginpabalik sang Sanggunian sa lebel sang PDC agud ipa-revise ang mga pangalan sang programa nga nakakabit ang tinaga nga “Kabalaka” bangud suno sa diri, nag apply sang lokal nga partido nga Kabalaka ang provincial government, nga isa sa nakikita sang provincial board nga posible mangin problema sa ulihi.
Apang, suno kay Contreras nga apisar wala ini sang makita nga conflicto sa paggamit sang “Kabalaka” nga tinaga bangud wala man naaprubahan sang Comelec ang ila aplikasyon, wala sa gihapon sang problema kun luyag ipapakas sang Sanggunian ang amu nga tinaga, basta madayon ang programa.
Sa pihak nga bahin, ginpahayag sang gobernador nga wala sang gahom ang mga board members nga tandugon ang pag-alokar sang mas mataas nga pondo sa mga evacuation center kag covered gyms ikumparar sa iban nga proyekto bangud base ini sa datos nga ginrequest sang mga barangay kun ano ang ila luyag nga proyekto.
Ginpromisa sini nga ang mga proyekto nga para sa pagpakay-o sang karsada ang may yara sang pondo nagikan sa national government.
