ROXAS CITY – Nagpasalig si Governor elect Esteban Evan Nonoy Contreras nga padayunon kag indi pagdulaon ang financial assistance kag burial package nga nagapanguna nga bulig sang gobyerno sa mga pumuluyo.
Ginhimo ini nga kumpirmasyon ni incoming Governor Contreras sa exclusive interview sang Bombo Radyo Roxas, kasunod sang report nga pagpauntat na sang gobyerno probinsiyal sa idalum sang pagdumala ni outgoing governor Antonio del Rosario sang financial assistance bangud ila pa gina-settle ang pila ka mga obligasyon sang gobyerno probinsiyal sa ospital.
Suno sa opisyal nga isa lamang ini sa mga programa sang administrasyon ni del Rosario nga dapat padayunon bangud tuyo sini nga makabulig sa nagakinahanglan nga mga Capizeño.
Magluwas sa financial assistance, padayunon man ang scholarship para sa mga kabataan nga luyag makatapos sa ila nga pagtuon.
Siguraduhon man sang incoming governor nga indi na malaktan sang pamulitika ang scholarship program sang gobyerno probinsiyal.
Ginpanindugan man ni Contreras nga dulaon sini sa iya administrasyon ang sobra nga pamulitika, bangud luyag sini nga mangin ”Governor of All” kag indi lamang gobernador sang pililion nga mga indibidwal.
