Sa pinakauna nga tion naghatag na sang statement sa Bombo Radyo ang gobernador sang probinsiya Bombo Rady angut sa kontrobersiyal nga supplemental budget sang Roxas Memorial Provincial Hospital nga ginasiling indi pag-aprubahan sang Sangguniang Panlalawigan bangud sa ila nga pagpamulitika.
Sa exclusive interview sang Bombo Radyo kay Governor Esteban Evan Contreras II, ginpahayag sini nga madugay na ang request sang RMPH para sa ila supplemental budget nga ginpa-in para sa sweldo sang mga medical frontliners sa amo nga ospital, medical supplies kag oxygen sang mga pasyente, apang tobtob sa karon wala pa maaprubahan bangud sa pag-ipit sa ila sang sanggunian.
Suno sa opisyal nga kasubong ginahimo ini sang sangguian partikular sang isa ka board member nga nagbuhi sang pahayag nga indi nila pag-aprubahan anuman ng mga supplemental re-alignment kun indi pag-ihatag ang pondo sang ila nga talatapan.
Apang ginklaro sini nga ang ginasiling pondo sang mga board members ang pondo sang executive department.
Ginpahayag ni Governor Contreras nga may nakita na nga pondo ang local finance committee nga pagakuhaan sang ginare-request nga supplemental budget sang RMPH kag approval na lamang sang sanggunian ang ginahulat para magamit ini, apang nagapakatig-a sila.
Gindugang pa ni Contreras kun naga-grand slam sila para gub-on ang iban nga tawo, kuntani ila tan-awon nga ang nagakinahanglan sini ang mga medical frontliners kag mga pasyente nga nagadangup sa RMPH.
Ginpanindugan pa sang opisyal nga okey sa iya kun ipton siya, apang nagpangabay ini sa mga board members nga indi pag-hold hostage ang sweldo sang mga frontliners nga nagahatag sang ila serbisyo kag nagasakripisyo para matatap ang mga pasyente labi na ang mga COVID-19 patients.
Kuntani suno sa gobernador nga makita ni Board Member Jonathan Sonny Besa ang kabudlay kag sakripisyo sang mga medical frontliners bangud ginabutang nila sa risgo ang ila kabuhi sa pagpanerbisyo.
