ROXAS CITY – Isa ka granada ang nakit-an sang pito ka tuig nga bata nga babaye nga nagahampang sa Sitio Tunga, Barangay Banica, sining syudad.
Sa interview sang Bombo Radyo Roxas kay April Rose Estandarte, iloy sang menor de edad nga bata, ginpahayag sini nga nakita sang iya anak ang nasambit nga granada samtang ini ang nagahampang kaupod ang iban nga mga bata.
Nagduda ang ginang kun matood ang granada nga nakita sang anak, bangud wala ini naglupok, sa pihak nga ginpaligid ligid sang menor de edad nga anak sa iya palad ang granada antes ginhaboy sa iloy, nga maswerte naman nga iya nasalo.
Apang aminado ang ginang nga nagpalangurog sa kahadluk ang bilog nga lawas matapos mauyatan ang granada sa diin ginkuha na lamang ini sang isa ka residente bangud hinali nga nagpangihi ang ginang sa tuman nga kahadluk nga nabatyagan.
Sa pag-estoryahanay sang mga residente ila nadesisyunan nga magpangayo sang assistance sa mga pulis, agud mahibaluan kun matood ini nga granada ukon hampanganan lamang.
Matapos makumpirma nga matood ang granada gilayon nga ginsulod sang mga pulis sa balde nga may balas kag gindala sa istasyon sang pulisya.
