Gin-anunsyo ni Bangko Sentral ng Pilipinas (BSP) Governor Eli Remolona Jr. nga ang Gross Domestic Product (GDP) sang Pilipinas ginalauman nga magahinay sa 3.8% sa fourth quarter sang 2025, halin sa 4.0% sa third quarter kag isa ka daku nga pagnubo halin sa 5.3% sa 2024.
Suno kay Remolona, ang pagnubo sini bangud sa nagapadayon nga epekto sang kontrobersiya sa flood control corruption nga amo ang kabangdanan sang mahuyang nga ekonomiya.
Dugang pa ni Remolona, ang pagnubo sang GDP gintuga sang manubo nga pamuhunan sa konstruksyon sang publiko, nga nagnubo sang 26.2% sa ikatlo nga quarter.
Ginsambit man sang BSP ang mga pagbuhin sa rate nga ginpatuman halin sang Agosto 2024 agud mapasanyog ang demand sang merkado, apang wala pa matapos sang BSP ang iya easing cycle.
Pahayag pa ni Remolona, may posibilidad pa nga dugangan ang rate cut sa masunod nga tuig depende sa estado sang ekonomiya kag bag-o nga datos nga ila matipon. Apang, ginhatagan niya sang importansya nga ang anuman nga tikang dapat himuon sing maayo agud indi makatuga sang dugang nga walay kapat-uran sa mga manugpuhunan.
