ROXAS CITY -Nagakahangawa ang pila ka mga mangunguma sa ila seguridad kasunod sang pagduso sang Housebill 6875 ukon Anti-Terror Bill sa Pilipinas.
Ini ang panindugan sang progresibo nga grupo nga Kahublagan sang mga Mangunguma sa Capiz (KAMMACA) Panay kasunod sang ika-122 ka tuig nga annibersaryo sang Independence Day.
Ginpahayag ni Mr. Angelo Orinse, tagpamamaba sang KAMMACA nga dako nga pamahog sa mga mangunguma nga padayon nga nagapakigbato sa reporma sa duta ang ginduso nga anti-terror bill sang pungsod.
Suno kay OrInse nga may pila ka mga mangunguma ang ginapasuni sang militar nga miyembro sang rebelde nga NPA.
Samtang gindayaw naman ni OrInse ang ginhimo nga pagbawi ni Capiz First District Representative Congressman Emmanuel Tawi Billones Sr. sa iya nga boto sa House of Representatives.
Nagalaum naman ang grupo nga KAMMACA nga indi pagpaboran ni Presidente Rodrigo Duterte ang ginaduso nga Anti-Terror Bill.
