Ginpanindugan sang grupo nga Karapatan nga daw kaangay nagakutkot sang kaugalingon nga lulubngan ang depensa ni VP Sara sa impeachment trial base sa mga ebidensya nga ila ginpresentar.
Sa interview sang Bombo Radyo kay Raoul Manuel, Karapatan National Council Member, iya ginpahayag nga sa baylo nga masabat kag mapamatud-an ang mga alegasyon batok sa Bise Presidente, daw kaangay nga ginapadaku lamang sang mga ginpresentar sang depensa ang mga palamangkutanon nga dapat nila klaruhon.
Suno kay Manuel, indi mapamatud-an sang depensa ang mga alegasyon may kaangtanan sa unexplained wealth ni VP Sara nga isa sa mga importante nga isyu nga gin-istoryahan sa impeachment trial.
Kalabanan sang mga testigo nga ginpresentar sang depensa daw wala sang personal nga ihibalo sa mga isyu nga ila ginapamatukan. Bangud sini, ginakwestyon nila ang kredibilidad sang mga testimonya nga ginpresentar sa atubang sang Senado.
Pahayag pa sini, sa baylo nga magbulig sa pagpaathag sang mga alegasyon, nangin kataw-anan ang iban nga mga testimonya bangud indi direkta nga masabat sang mga testigo ang mga pamangkot may kaangtanan sa mga isyu nga gina-atubang sang Bise Presidente.
Magluwas sini, importante para sa mga senator-judges nga usisaon sing maayo ang tagsa ka testimonya kag ebidensya nga ginpresentar sang magtimbang nga bahin agud indi magsalig lamang sa mga pahayag sang mga saksi sa pagporma sang ila desisyon.











