Nagapangita sang iban pa nga pamaagi ang grupo sang manufacturing companies sa Pilipinas sa pag-atubang sang mataas nga presyo sang gatong antes ang pagpasaka sang presyo sang produkto nga ginabakal sang tawo.
Suno sa Supply Chain Management Association of the Philippines (SCMAP), ang pagpataas sa presyo sang goods ilabi na ang basic necessities amo ang ila nga last option.
Pahayag sang asosasyon, luyag sang mga kompaniya nga mapabilin nga barato ang produkto agud makabulig sa mga manugbakal.
Pila sa mga stratehiya nga ginahimo sang grupo amo ang pag-negosyar sa transport providers sa mas manubo nga rates kag pag-reserve sang spots sa mga cargo ships sang mas timprano agud mabaydan ang subong nga shipping price kag indi ang posible pagmahal sang suktanay.
Dugang pa sang asosasyon, indi mahimo ang pagpabilin sa manubo nga presyo sang mga produkto kun ang private sector lang ang magahulag gani nagapanawagan ang mga ini sang bulig sa gobyerno nga temporaryo buhinan ukon i-suspend ang fuel excise taxes.
