Nagapanawagan ang grupo sang mga manunudlo kag mga ginikanan nga pagatalakayon ni President Ferdinand Marcos Jr. ang isyu sang adolescent pregnancy sa iya nga State of the Nation Address (SONA).
Ini kasunod sang padayon nga pagsaka sang numero sang mga kabataan nga nagapanganak, ilabi na ang mga nagaedad sang 10 tubtob 14 anyos.
Sa interview sang Bombo Radyo kay Principal Maria Zaida Padullo, spokesperson sang Parents and Teachers for Adolescent Pregnancy Prevention, iya ginpahayag nga ginasuportahan sang ila nga grupo ang pag-certify bilang urgent ang Proposed Adolescent Pregnancy Prevention Act.
Suno kay Padullo, kinahanglan nga himuon ini nga prayoridad nga kasuguan agud mapadasig ang mga tikang batok sa nagadamo nga kaso sang adolescent pregnancy.
Ginpahayag man sini nga naglab-ot na sa 6.8 percent ang kaso sang adolescent pregnancy sa pungsod.
Dugang pa sini nga importante nga mahatagan sang insakto kag nagakaigo sa edad nga impormasyon ang mga kabataan nahanungod sa adolescent pregnancy kag reproductive health.
Ginsiling man sini nga kun mapatuman ang kasuguan, mas masiguro nga ang mga pamatan-on makabaton sang husto nga impormasyon kag suporta agud malikawan ang temprano nga pagbusong.
