Ginakabalak-an subong sang pila ka mga pamatan-on, partikular ang Kaya Natin Youth group bangud sa pagpaisol sang Barangay kag Sangguniang Kabataan Elections nga matabo kuntani subong nga tuig.
Sa eksklusibo nga interview sang Bombo Radyo sa isa sa mga petitioners kag opisyal sang Sangguniang Kabataan nga si Luis Magat, ginpakigbahin sini ang iya panghuna-huna kon bala lubos nga ipaiway ang eleksyon sa Disyembre.
Suno sa iya, nagapati sila nga ang pag-isol sini ang may yara lamang sang direkta nga epekto, ilabi na sa mga pamatan-on nga ginalauman nga magboto ukon magpadalagan bilang opisyal sa ila tagsa ka lugar ukon barangay.
Apisar nga may mga nag-file sang petisyon sang una, ginpahayag ni petitioner Luis Magat nga ang ila pokus diri amo ang mga pamatan-on nga posible indi paghatagan sang kinamatarong sa pagboto, ilabi na sa Sanggunian Kabataan.
Madumduman nga ginpasaka nila sa Korte Suprema ang Petition for Certiorari kag Urgent Motion for a Temporary Restraining Order kag Writ of Preliminary Injunction batok sa laye nga ginpirmahan ni Presidente Ferdinand Marcos Jr.
Gani, dugang nga ginpaathag sang petitioner nga paagi sa pag-isol sang eleksyon halin subong nga tuig tubtob sa Nobyembre 2026, ang iban nga mga pamatan-on indi na makasulod sa edad sang Sangguniang Kabataan.
Nagakahulugan ini nga indi sila paghatagan sang kahigayunan nga makaboto kag makapadalagan bilang opisyales para sa Sangguniang Kabataan sang ila barangay ukon lugar.
Gikan diri, nagapaawagan ini sa iya mga kaupod nga pamatan-on nga suportahan ang petisyon bangud suno sa iya, ini man ang ila kinamatarong nga ila ginapakigbato.
