Ginpasidunggan sang pila ka grupo sang negosyante kag mangunguma ang kampanya sang gobyerno batok sa iligal nga paghimo kag pag-smuggle sang sigarilyo sa pungsod.
Suno sa Federation of Free Farmers, Federation of Philippine Industries kag British Chamber of Commerce of the Philippines, ang serye sang operasyon sang gobyerno nagapahayag nga seryoso ang mga otoridad sa pagpanalipod sang lehitimo nga negosyo kag kita sang gobyerno.
Ini matapos madiskubrehan kag mapasira sang mga otoridad ang pila ka iligal nga pabrika sang sigarilyo sa Pampanga kag makumpiska ang milyon ka pesos nga balor sang iligal nga tobacco products.
Suno kay DILG Secretary Jonvic Remulla, ginpabakod sang gobyerno ang operasyon batok sa mga sindikato sang iligal nga tobacco nga ginapatihan naga-operate sa Central Luzon kag iban pa nga lugar sa pungsod.
Ginbanta man sang opisyal nga nagaabot sa ₱400 milyon ang balor sang nakumpiska nga kagamitan kag materyales sa mga nasambit nga pabrika.
