ROXAS CITY, CAPIZ – Padayon ang misyon sang Gugma Para sa Capiz Eye Care Clinic sa paghatag sang de-kalidad nga serbisyo medikal para sa mata sa bug-os nga probinsya sang Capiz.
Sa interview sang Bombo Radyo kay Dr. Carlomagno D. Kuizon, Ophthalmologist sang Roxas Memorial Provincial Hospital, iya ginpahayag nga tinutuyo sang clinic nga mangin healthy ang mata sang mga Capisnon, ilabi na sa mga komunidad nga may limitado nga access sa kasubong nga sahi sang serbisyo.
Suno kay Dr. Kuizon, ang pinaka-common nga problema sa mata amo ang katarata, maburon nga panan-awan, kag iban pa nga kondisyon nga kinaandan nga naeksperyensyahan sang mga katigulangan. Apang gin-athag sini nga ang problema sa mata ang mahimo man nga maeksperyensyahan sang bisan ano nga edad, lakip na ang mga bata.
Dugang pa sang natungdan, pila sa mga nagapanguna nga serbisyo nga gina-offer sang clinic amo ang libre nga eye screening kag konsultasyon. May ara man sang espesyal nga programa para sa mga bata kag senior citizens agud gilayon nga matumod ang anuman nga problema sa panan-awan kag maagapan ini.
Ginahatagan man sang pagtamod sang clinic ang importansya sang timprano nga pagpakonsulta sa mata, apisar wala sang may nabatyagan nga sintomas.
Pahayag ni Dr. Kuizon, ang indi matatapan ukon ginpabay-an nga kondisyon ang mahimo nga magresulta sa permanente nga pagkabulag.
Ginarekomenda sang eksperto nga magpa-check up sang mata bisan isa ka bes sa isa ka tuig.
Agud mapabilin ang healthy nga mata, ginapanugyanan ang publiko nga mag-angkon sang insakto nga diet, magkaon sang masustansya nga pagkaon kasubong sang utan kag prutas, kag maglikaw sa sobra nga paggamit sang gadgets. Para naman sa mga masami nga nakatutok sa computer ukon cellphone, importante ang regular nga pahuway sang mata agud malikawan ang eye strain.
Nagpahanumdom man ang natungdan nga importante ang pag-atipan sa mata bilang kabahin sang pangkabug-usan nga ikaayong-lawas.
– With an interview from Bombo Jessa Mae Siman De Los Santos
