Nakatalana nga magpahamtang ang Commission on Elections (Comelec) sang mga checkpoints sa mga istratehiko nga lugar sa pungsod sumugod subong nga weekend.
Ini ang suno kay Comelec Chairman George Erwin Garcia, kasunod sang pagsugod sang election period para sa 2025 National and Local Elections (NLE) sa Enero 11 nga magatakop sa Hunyo 12.
Sa nasambit nga period igapatuman naman nila ang gun ban gani kinahanglan na nga magpahamtang sang mga checkpoints, nga pagadumalahan sang mga miyembro sang military kag police.
Gin-athag naman ni Garcia nga pagaobserbahan lamang ang ‘plain view doctrine’ sa mga checkpoints, nagakahulugan nga kinahanglan nga buksan sang mga motorista ang mga bintana sang ila nga mga salakyan kag pasigahon ang suga sa sulod kun mag-agi sa mga checkpoints kag indi na kinahanglan pa nga buksan ang compartment, trunk ukon ang ila nga mga bags.
Sa idalom naman sang gun ban, hugot nga ginadumilian ang pagbitbit sa guwa sang balay sang mga makamamatay nga hinganiban, kasubong sang mga armas-luthang, bala, patalom, explosives kag iban pa.
Dugang pa sini nga ang mga alagad lamang sang kasuguan ang mahimo nga magbitbit sang armas sa guwa sang balay, magluwas na lamang kun makakuha sila sang gun ban exemption gikan sa Comelec.
Nagpaandam man si Garcia nga ang tanan nga madakpan nga nagalapas sa gun ban, pagaarestuhon kag pagapasakaan sang nagakaigo nga kaso.
