PONTEVEDRA, CAPIZ- Nagdangat sa P481,500 ang ginbilin nga kahalitan sang nasambit nga sunog sa Sitio Malic, Brgy. Ilawod, banwa sang Pontevedra kun sa diin duha ka balay ang totally burned kag isa ang partially burned.
Ang mga puluy-an nga totally burned ang ginapanag-iyahan nanday Ana Dy kag Jadema Barugo, samtang ang isa ka partially burned nga balay ang ginapanag-iyahan ni Felomino Burata Dy.
Sa interview sang Bombo Radyo kay Fire Officer 1 Marve D. Dumolong, Fire Arson Investigator sang Bureau of Fire Protection (BFP)-Pontevedra, ginpahayag nga takna las 6:00 sang gab-i nakabaton ang sila sang tawag sa diin may nagpahibalo nga may nagluntad nga sunog sa amo nga lugar.
Gilayon ini nila nga ginpadaulungan kag didto nagtambad sa ila ang dako na nga kalayo.
Dugang pa sini, kaangay ginkakibot nila ang natabo bangud nga suno sa iya madamo nga mga tawo ang gin-una pa nga mag live sa social media imbes kuntani nga gin-report sa ila nga talatapan insigida agud nga gilayon man nga napadulungan ang amo nga sunog.
Nahibaluan nga ginpasaka sa 3rd alarm ang amo nga sunog sa diin nga nagresponde naman ang BFP Panitan, BFP Pres. Roxas, BFP Panay, kag Capiz Citizen Action Group (CACAG) agud nga magbulig sa pagpalong sang kalayo.
Samtang , takna las 7:00 sang gab-I, gindeklarar na nga fire-out. Maswerte naman nga wala sang may nabiktima sa amo nga sunog.
Nagpanugyan naman ini sa publiko, ilabi na sa mga vlogger nga kun mahimo, unahon anay ang magpahibalo sa mga nagakalatungdan kun may kasubong nga hitabo agud nga gilayon nga maaksyon antes nga mag vlog.
Sa karon, padayon pa ang imbistigasyon sang mga bombero angut sa nasambit nga insidente.
With a report from Bombo Jessa Mae De Los Santos
