Naglab-ot na sa P2.34 billion ang halit sa sektor sang agrikultura tuga sang asud-asod nga bagyo kag ulan nga dala sang habagat sang tinalikdan nga semana, suno sa Department of Agriculture (DA).
Base sa pinakaulihi nga report sang Department of Agriculture (DA), naapektuhan ang 74,895 ka mga mangunguma kag manugpangisda, kadungan sang pagkasira sang 53,356 metric tons sang ani sa mas ukon menos 71,958 ka ektarya sang ulumhan.
Pinakadako nga halit amo ang sa humay, nga naglab-ot sa P1.27 billion kun sa diin saan nasira ang kapin 67,000 ka ektarya sang talamnan.
Dugang pa diri, ang pagkalugi sang sektor sang mais nga naglab-ot sa P83.44 million samtang 9,574 metric tons naman ng sahigh-value crops ang nasira.
Bilang sabat, nagtigana ang DA sang P653.01 million nga ayuda kasubong sang binhi, free-range nga manok, fingerlings, kag mga kagamitan kontra peste. Nagpanagtag man ang National Food Authority (NFA) sang 43,940 ka sako sang bugas sa mga apektado nga Local Government Unit pareho sang sa Palawan, Pangasinan, kag Albay.
Naka-activate na man ang Quick Response Fund para sa rehabilitasyon, samtang may P400 million nga pautang sa idalom sang SURE Loan Program para sa mga apektado nga mangunguma nga wala sang interes kag pagabayaran sa sulod sang tatlo ka tuig.
Nagtigana man ang Philippine Crop Insurance Corporation (PCIC) sang P268 million bilang pauna nga bayad para sa kapin 46,000 nga insured nga mangunguma.
Apisar indi direkta nga ginsambit ni Presidente Ferdinand Marcos Jr. ang epekto sang nagligad nga kalamidad sa iya ika-apat nga State of the Nation Address (SONA) sang Hulyo 28, ginsiling niya nga nakapalab-ot na ang iya nga administrasyon sang bulig sa masobra 8.5 milyo ka mga mangunguma kag manugpangisda sa bug-os nga pungsod.
